Hæ ég heiti Embla Rún og þetta er heimasíðan mín

Póstarnir mínir af Barnalandi

2004-09-28T18:49:00.000Z

Í dag fengum við mamma bumbuhópinn okkar í heimsókn, það var mjög gaman að fá þær og sjá vinkonur mínar. Ég segi vinkonur mínar því strákarnir þrír sem eru í hópnum komust ekki. Amma kom í heimsókn eftir vinnuna sína því hún saknaði mín svo mikið. Hún hjálpaði mömmu að baða mig og fannst það rosalega gaman. Pabbi er að fara á æfingu svo í kvöld og ég og mamma ætlum að horfa á video með Írisi Ósk frænku. Okkur finnst nú pabbi vera svolítið mikið í burtu og vonum að hann hætti að æfa svona mikið :Þ

28.9.2004 | 18:42
[breyta]
Ég og mamma erum nú frekar eirðarlausar eitthvað þessa dagana. Vorum heima í dag og leiddist eitthvað svo mikið svo við rændum bílnum af afa og fórum í bíltúr. Kíktum í Fífuna og keyptum okkur BabyBjörn burðarpoka fyrir mig, beisli og bleyjur svo í Rúmfatalagernum. Mamma fór svo í sund með ömmu í kvöld og ég var hérna heima með pabba mínum því ég má ekki fara með henni strax því ég er svo lítil ennþá, byrja samt í ungbarnasundinu eftir rúman mánuð :).
28.9.2004 | 00:44
[breyta]
Helgin er búin að vera rosalega róleg á þessu heimili. Í gær gerðum við nákvæmlega ekki neitt en Íris frænka var hjá okkur í nótt því amma og afi voru ekki heima. Í dag var ég voða dugleg að sofa í vagninum mínum svo mamma og pabbi gætu gert heimilið okkar fínt. Ég er algjört ljós í augum foreldra minna og alltaf jafn góð.
26.9.2004 | 23:01
[breyta]
Dagurinn í dag er búinn að vera skemmtilegur, nóg að gerast. Við mamma byrjuðum á að labba upp í Hagkaup og kaupa meðlæti því við fórum að hitta vini mína í bumbuhópnum hennar mömmu. Það var gaman að hitta þau sem mættu. Eftir hittinginn svaf ég í vagninum mínum í ca. klst og svo fórum við með ömmu Sigrúnu í Kringluna og versluðum aðeins á mig. Þetta átti reyndar að vera verslunarleiðangur fyrir ömmu en auðvitað eins og alltaf þá keypti amma ekki neitt en mamma missti sig í barnadeildinni í Next. Eftir fyrstu Kringluferðina mína fórum við mamma heim að knúsast á meðan pabbi var á æfingu.
24.9.2004 | 00:58
[breyta]
Afi Óttar fór til útlanda í morgun og verður í viku. Við mamma tókum bílinn hjá pabba í dag því við nenntum ekki að vera heima. Við fórum í heimsókn til ömmu Sigrúnar í vinnuna og fórum með henni á McDonalds að fá okkur að borða. Mamma keyrði svo í árbæinn til að kíkja á fjöldkylduna í Víkurási, langamma Ellen kíkti svo við þar líka. Það var voða gaman að hitta Birgittu frænku, rosalega verður gaman að fara að rífa í hárið á henni þegar ég verð stærri :). Eftir þá heimsókn héldum við okkur við árbæinn og fórum í heimsókn til Sigrúnar skáömmu og Ellu vinkonu hennar mömmu, stoppuðum bara stutt þar því pabbi var þá búinn í vinnunni sinni og búið var að ákveða að heimsækja Hebu vinkonu mömmu og fjölskylduna hennar. Kolfinna Dröfn er voða voða lítil og mömmu fannst hún ekki kunna á svona lítið barn sem er bara fyndið því ég var nú minni en hún þegar ég fæddist :Þ. Eftir þessa heimsókn var ég nú bara alveg uppgefin eftir að hitta svona rosalega marga á einum degi. Ákvað því bara að slaka á í kvöld og er búin að liggja og brosa og hjala fyrir mömmu og pabba því þeim finnst það svo yndislegt. Mér líður nefnilega langbest þegar ég fæ næga athygli og þegar þau nenna að spjalla við mig. Verð nú bráðum að fara að hitta ömmu og afa í sveitinni því ég sakna þeirra svo mikið....
21.9.2004 | 00:29
[breyta]
Í dag vék ég sko ekki frá pabba mínum. Við byrjuðum daginn á að fara í bakaríið og sækja bakkelsi í hádegiskaffi hjá ömmu og afa í Hamravíkinni, Andri og Tinna komu þangað líka. Pabbi var svo með mér og Írisi í Hamravíkinni á meðan mamma og amma fóru í Smáralind, þær geta sko endalaust verið í búðum :). Ég var nú farin að sakna langömmu og langafa í Langagerðinu svo við skelltum okkur þangað í heimsókn og lentum þar í mat og fórum ekki heim fyrr en seint í kvöld. Vinkona mín var skírð í dag og heitir núna Kolfinna Dröfn, til hamingju með nafnið og vonandi sjáumst við fljótlega. Núna ligg ég bara hjá pabba mínum og líður voða voða vel. Klukkan er orðin margt svo ég segi bara Góða nótt.
18.9.2004 | 23:25
[breyta]
Í dag er föstudagur og það er loksins komin helgi. Þá fæ ég að hafa pabba minn hjá mér allan daginn og hann þarf ekki að fara í vinnuna, það finnst mér skemmtilegt. Í gær vorum við mamma bara heima allan daginn en í dag fórum við með Sigrúnu ömmu, langömmu Diddu og Sigga Langafa til Lilju, Reynis, Kristófers og Litla frænda. Mér finnst litli frændi voðalega sætur og við eigum örugglega eftir að vera góðir vinir þegar við verðum stærri. Það er mynd af okkur í albúminu mínu. Pabbi kom heim úr vinnunni þegar við komum heim og við knúsuðumst alveg fullt því við söknuðum hvors annars svo mikið :). Mamma og pabbi voru nú svo rugluð í kvöld að þau settu mig í eldfast mót og vigtuðu mig á eldhúsvoginni eins og ég væri bara einhver matur :Þ Ég var nú með bleyjuna mína og í náttfötunum svo það er ekkert að marka hvað sú vigt sagði.
17.9.2004 | 20:57
[breyta]
Í gær fór ég og hitti vini mína sem ég kynntist þegar ég var í bumbunni á mömmu og þau voru í bumbunum á mömmum sínum. Við erum nú algjörar dúllur saman. Þegar við vorum búnar að vera þar í kræsingum og spjalli fórum við að kaupa sængurgjafir handa tveimur nýjustu einstaklingunum sem ég þekki. Pabbi þurfti svo að fara og fá sér æfingagalla merktan KR því hann var að skipta um félag og ekki þýðir að vera í Víkverjagallanum á æfingum og á mótum. Maðurinn í búðinni gaf mér svo KR bolta því ég var svo sæt og góð, afi er nú ekki sáttur við það því hann vildi að ég hefði fengið Vals bolta. Mamma var nú svo skrítin í gær því hún tók allt í einu upp á því að setja hendurnar mínar og fætur í stimpilpúða svo ég varð öll svört og setti svo einhverja bók upp að mér svo það komu fóta og lófaför á hana, þetta fannst mér nú skrítið. Mamma var svo ekkert að ná þessu af svo við drifum okkur barasta í bað saman því hún var líka öll svört á höndunum eftir þetta vesen. Mér finnst svo gaman í baði að það skríkir alveg í mér, við æfum okkur líka alltaf í leiðinni fyrir ungbarnasundið sem ég hlakka svo til að fara í. Ég var voðalega stillt og góð í gærkveldi því ég sofnaði kl. 0:30, er sko búin að vera að fara að sofa kl. 2-4 og mamma var orðin svo þreytt.

Í dag byrjaði ég á því að gubba yfir alla mömmu og mig sjálfa en annars erum við mamma svo bara heima að slaka á. Við ætlum að reyna að fá Írisi frænku til að koma eftir skóla og vera með mér svo mamma geti gert eitthvað að viti. Ég er nefnilega svo mikil félagsvera að ég vil helst bara láta halda á mér og láta spjalla við mig. Mömmu finnst nú ekkert leiðinlegt að tala við mig samt en hún vill nefnilega líka alltaf vera að gera heimilið okkar fínt svo okkur líði vel.

15.9.2004 | 12:29
[breyta]
Ég eignaðist vinkonu á fimmtudaginn því Heba vinkona hennar mömmu átti stelpu. Hún er örugglega algjör dúlla og mig hlakkar til að fara í heimsókn til þeirra og kynnast henni. Við segjum auðvitað til hamingju við þau öll og vonum að þeim gangi eins vel að aðlagast eins og okkur.
12.9.2004 | 22:42
[breyta]
Ég fór í 6 vikna skoðun í dag og læknirinn var ánægður með mig. Ég þyngdist nú reyndar ekkert mikið en er orðin heilir 55 cm, sem sagt algjör risi. Læknirinn heyrði ekkert óeðlilegt við hjartað mitt svo við skulum vona að það sé í lagi. Annars er ég bara búin að vera heima með mömmu minni og pabba og hafa það rólegt.
8.9.2004 | 21:37
[breyta]

Barnaland

2004-09-13T01:26:00.000Z

Ég er með síður út um allt sko. Núna var ég að búa mér til síðu á barnalandi, slóðin er hér. Ég er samt ekki búin að ákveða hvort ég ætli að hafa hana, sjáum til.

hér er mynd af mér

2004-09-08T22:06:00.000Z

Sjáðu bara hvað ég er sæt

updeit

2004-09-08T21:55:00.000Z

Ég fór í 6 vikna skoðun í dag og læknirinn var ánægður með mig. Ég þyngdist nú reyndar ekkert mikið en er orðin heilir 55 cm, sem sagt algjör risi. Læknirinn heyrði ekkert óeðlilegt við hjartað mitt svo við skulum vona að það sé í lagi. Annars er ég bara búin að vera heima með mömmu minni og pabba og hafa það rólegt.
8.9.2004 | 21:37
[breyta]
Í dag var ég heima með mömmu minni og pabbi var að vinna. Mamma leyfði mér að leika mér á leikteppinu mínu og mér fannst það svo gaman að ég hjalaði og skríkti voða mikið, mamma gat ekki tekið af mér augun því henni fannst þetta svo falleg sjón. Ég saknaði pabba míns því hann hefur aldrei verið svona mikið frá mér eins og í dag því hann fór á æfingu eftir vinnu. Mamma fór svo í sund á meðan pabbi var á æfingu svo afi var að passa mig á meðan. Ég var ekkert rosalega góð við hann því ég grét hástöfum allan tímann og ekki var hægt að ná í mömmu mína né pabba. Mér varð nú ekkert meint af þessu og fékk bara að drekka strax og mamma kom. Við mamma skelltum okkur svo saman í bað og æfðum okkur eins og Óli í ungbarnasundinu sagði okkur að gera. Ég var ekkert hrædd heldur bara buslaði og spriklaði eins og ég væri að reyna að synda frá mömmu og var voða dugleg. Mig hlakkar bara til að fara í sundið því þetta var svo gaman :)

8.9.2004 | 01:47
[breyta]
Í gær fékk ég nafn og er alveg rosalega ánægð með það. Það klæðir mig líka svo vel :). Mamma mín hefur eiginlega ekkert haft tíma til að vera með mér í gær og daginn þar áður vegna undirbúnings svo ég er búin að vera voða mikið á brjóstinu í dag. Ég er bara því meir búin að vera hjá pabba og það er líka gaman en hann hefur því miður engin brjóst. Ég eignaðist lítinn frænda á miðvikudaginn var, 1. september og er rosalega ánægð með hann, við eigum eftir að fara og sjá hann. Heba vinkona hennar mömmu á að eignast barn í dag og það verður gaman að kynnast því kríli, vonandi að það komi út á réttum tíma. Pabbi er víst eitthvað sár yfir því hvað lítið hefur verið skrifað um það en ég er nú bara rétt að byrja svo það kemur að því.
7.9.2004 | 01:04
[breyta]
Upphafið

Frá því ég fæddist er ég búin að vera voða góð. Mamma mín hélt fyrsta sólarhringinn að ég kynni barasta ekki að gráta. Við fengum að fara heim á degi nr. 2 því ég lenti á vöku vegna þess að ég var með vot lungu eins og læknarnir sögðu, þeir sögðu nú samt þegar ég var útskrifuð að ég gæti alveg orðið maraþonhlaupari því þetta hefði engin áhrif á mig. Við mamma vorum nú svolítinn tíma að læra á brjóstagjöfina en Magga ljósa var voða dugleg að hjálpa okkur. Mamma losnaði samt að mestu leyti við stálma og var fegin yfir því. Eftir að Magga hætti að koma fór hjúkrunarfræðingur að koma til okkar og vigta mig og sagði að ég væri voða fín stelpa, eins og allir aðrir. Ég þyngist rosalega vel og geri mömmu mína því mjög stolta af mér. Ég verð vigtuð á morgun og mamma er spennt að vita hvort ég þyngist svona vel áfram. Ég er byrjuð að fylgast vel með þegar talað er við mig og það kemur fyrir að það stökkvi fram bros við og við, ég er þó ekkert að gefa þau heldur þarf fólk að vinna fyrir þeim. Mér finnst voða gott að drekka og verð óþolinmóð ef mamma er ekki nógu fljót að fletta upp um sig þegar ég er orðin svöng. Ég fór fyrsta skipti í göngutúr í vagninum mínum þegar hitabylgjan reið yfir landið en mamma var nú eiginlega bara að stelast því hjúkkan sagði að ég mætti ekki fara út í vagn fyrr en ég er orðin 4 kg. Ég hef ekki enn fengið að sofa úti en mamma er alveg viss um að ég eigi eftir að sofa vel og lengi úti því ég vil helst ekki sofa í vöggunni minni heldur láta vesenast og þvælast með mig út um allt, þá sef ég best. Mamma og Pabbi hafa valið nafnið mitt og rosalega er það nú gaman að halda því svona leyndu fyrir öllum. Það fer nú að styttast í það að hinir fái að vita því það verður haldin voða fín veisla á sunnudaginn.

Nóg komið í bili, læt vita af mér þegar eitthvað nýtt gerist.

2.9.2004 | 00:54
[breyta]

Nafnið mitt

2004-08-13T15:02:00.000Z

Þetta á að vera nafnið mitt en það er ennþá leyndó :)

Leyndó

2004-08-04T18:36:00.000Z

Síðan mín er leyndó þar til ég hef fengið nafnið mitt því það veit enginn hvað ég á að heita :Þ